Qeveria e ka cilësuar aksidentale vdekjen e 25-vjeçarit, Klodian Rasha. Kështu shkruhet tekstualisht në vendimin e Këshillit të Ministrave, për dëmshpërblimin financiar të familjes së të riut, botuar sot edhe në Fletoren Zyrtare.
“Dhënien e trajtimit të veçantë familjes të të ndjerit Klodian Rasha, i cili, në datën 8.12.2020, humbi jetën aksidentalisht, si pasojë e veprimeve policore, në masën e tetëfishit të pensionit social, të miratuar sipas ligjit nr. 7703, datë 11.5.1993”, thuhet ndër të tjera në vendim.
Por, për këtë ngjarje, efektivi i ”Shqipnjave” ndodhet në burg, i akuzuar për vrasje.
Një tjetër gafë është edhe data që qeveria vendos të fuqizojë vendimin: datën 1 dhjetor 2020.
KKlodian Rasha u qëllua për vdekje, mëngjesin e 8 dhjetorit pranë banesës së tij, në afërsi të rrugës “Dritan Hoxha”.
“Vrasja aksidentale” dhe “data 1 dhjetor” janë thjesht gafa të qeverisë apo mos ndoshta kryeministri Edi Rama, që ka firmosur edhe VKM, kërkon të parashikojë edhe fatin e procesit gjyqësor në ngarkim të efektivit? Kjo mbetet për t’u parë.
Ekzekutimi i Rashës shkaktoi një reagim të fortë popullor. Ai u qëllua për vdekje nga një efektiv i ”Shqiponjave”, pasi kishte thyer orën policore.
Për këtë arsye, Ministri i Brendshëm, Sandër Lleshaj dha dorëheqjen, por protestuesit kërkojnë edhe largimin e Drejtorit të Përgjithshëm të Policisë së Shtetit, Ardi Veliu.
