Themeluesi i “Fundjavë Ndryshe”, Arbër Hajdari, ka mbajtur një takim të ngrohtë e miqësor me përfaqësuesen e Shoqatës Kombëtare të të Verbërve dhe anëtar të komunitetit të të verbërve të qytetit të Gramshit, për të diskutuar për nevojat e tyre imediate e për të shtrirë edhe më tej fokusin dhe ndihmën në këtë kategori në nevojë. Në një tavolinë ku ishin bërë bashkë anëtarët e kësaj shoqate, Arbër Hajdari e vuri theksin në nevojat e përditshme që ata kanë, dhe sa e nevojshme është ndihma për ta, një mundësi dhe integrim për të verbërit. “Fundjavë Ndryshe” ka kohë që ka përkrahur këtë komunitet, e ndërsa drejtuesi i fondacionit premtoi se nuk do të ndalen, por do të vazhdojnë që ta shtrijnë aktivitetin dhe më gjerë.
“Jemi në Gramsh, me një grup miqsh që janë të gjithë pjesë e Shoqatës së Verbërve të Shqipërisë. Jemi duke diskutuar problemet që ata kanë, dhe se si ne mund ti gjendemi në hallet dhe problemet e tyre.
Aq më tepër që është një grup njerëzish që kanë nevoja të përditshme, nevoja të ndryshme. Kemi ardhur dhe po diskutojmë për më shumë se dy orë shqetësimet e tyre, problemet afatgjatë dhe për ti dhënë një drejtim tjetër dhe me të vazhdueshëm, periodik kësaj ideje të Shoqatës së të Verbërve sepse po të ishit këtu me mua dhe të dëgjonit shqetësimet dhe hallet që kanë, do ta kuptonit se e rëndësishme është që ky grupim njerëzish të ishin ndër më kryesorët, të ndihmoheshin, që sado pak ti lehtësohet jetesa”, u shpreh Arbër Hajdari.
Një nga përfaqësueset e shoqatës parashtroi kërkesën për ndihmë, pasi nevojat janë të ndryshme.
“Qyteti i Gramshit është i bukur, por ka nevoja të ndryshme. Qoftë në të përditshmen por edhe afatgjatë. Bashkohuni me ne, me ndihmën për të kontribuar për çdo familje, sipas nevojave që ata kanë”.
