Koronavirusi vijon të marrë me mijëra jetë njerëzish dita ditës. Ekspertë nga e gjithë bota po punojnë për gjetjen e një vaksine që do t’i jepte fund këtij makthi.
Mirëpo Organizata Botërore e Shëndetësisë e sheh me skepticizëm idenë se fundi i koronavirusit mund të jetë afër.
Drejtori Rajonal për Paqësorin Perëndimor në OBSH, Takeshi Kasai është shprehur së fundmi se fundi i kësaj epidemie është akoma larg. Në një prononcim për Reuters, Kasai i bëri thirrje shteteve të prekura që të mos e ulin vigjilencën e tyre.
“Edhe në Azi-Paqësor ku situata duket se po stabilizohet, fundi i epidemisë është larg. Edhe me të gjitha masat, rreziku i transmetimit në rajon nuk do të largohet për sa kohë që pandemia vazhdon. Më lejoni të jem i qartë. Epidemia është shumë larg fundit në Azi dhe Paqësor. Kjo do të jetë një betejë afatgjatë dhe ne nuk mund ta ulim gatishmërinë. Ne kemi nevojë që çdo vend të vazhdojë të përgatitet për transmetimin e komunitetit në shkallë të gjerë”, tha ai.
Për momentin është Evropa ajo e cila konsiderohet si epiqendra e koronavirusit, por OBSH paralajmëron se kjo gjë mund të ndryshojë.
Rritja e frikshme e numrit të të prekurve nga Covid-19 në SHBA, ka bërë që ekspertët të dyshojnë se Amerika mund të kthehet shumë shpejt në epiqendrën më të re të koronavirusit vdekjeprurës.
