Kremlini ka njoftuar se Vladimir Putin ka marrë një ftesë për t’u bashkuar me një “Bordin e Paqes” të udhëhequr nga SHBA-të për Gazën.
Udhëheqësi rus po e shqyrton aktualisht propozimin, sipas zëdhënësit të Kremlinit, Dmitry Peskov.
Presidenti i SHBA-së, Donald Trump, do të kryesojë bordin ekzekutiv të organizatës, ndërsa mendohet se midis anëtarëve të tjerë do të jetë edhe ish-kryeministri britanik Tony Blair.
Peskov tha se Putin kishte “marrë një ftesë përmes kanaleve diplomatike për t’u bashkuar me këtë Këshill Paqeje”.
“Për momentin, po studiojmë të gjitha detajet e këtij propozimi dhe shpresojmë të kemi kontakte me palën amerikane për të sqaruar të gjitha nuancat”, tha ai..
Më herët të hënën, udhëheqësi i Kazakistanit pranoi gjithashtu një ftesë për t’u bashkuar me të njëjtin bord, sipas zëdhënësit të tij.
Trump ka ftuar 60 vende të bashkohen me Bordin e Paqes, por anëtarësimi i përhershëm do të jetë në dispozicion për ata që paguajnë 1 miliard dollarë.
