Drejtori i zyrës së PR-it të FSHF-së, Andi Verçani ka reaguar pas diskutimeve të lindura, nëse ndeshja Shqipëri-Francë do të luhet në stadiumin “Arena Kombëtare” apo jo.
Në një prononcim për ‘Panorama Sport’, Verçani deklaron se zërat që kanë dalë në lidhje me problemet në lidhje me sistemin e transmetimit dhe akomodimin e gazetarëve, janë të pavërteta.
Sa i përket kushteve të vendosura nga UEFA, ai u shpreh se pavarësisht problemeve të vogla, standardet e kërkuara janë plotësuar.
“FSHF dëshiron të informojë opinionin publik se në një vepër publike madhore siç është stadiumi i ri Kombëtar, ka pasur dhe ka probleme të vogla të cilat ndeshjen në çdo investim madhor, jo vetëm në Shqipëri, por edhe në botë. Ne ju sigurojmë se të gjitha zërat që kanë dalë se ka probleme në lidhje me sistemin e transmetimit dhe akomodimin e gazetarëve, janë totalisht të pavërteta. Çuditemi nga fakti se nga kanë dalë këto informacione.
Stadiumi është i kategorisë së katërt, pasi i mungon vetëm kriteri i kapacitetit për të pasur kategorinë maksimale (pestë). Ka të gjitha vendet për komentatorët, të gjithë vendet në Kategorinë A për një ndeshje si Shqipëri-Francë. Ka 105 vende në pozicionin më të mirë në stadium për komentatorët dhe gazetarët sportiv. UEFA, në manualin e stadiumit kërkon 75 pozicione të tilla (me tavolinë), ndërsa impianti e ka tejkaluar këtë shifër. Sigurisht që kjo gjë dhe gjithçka tjetër do të raportohet ditë pas dite te UEFA, derisa të verifikohet edhe linja e internetit e gjithçka tjetër. Stadiumi e ka marrë miratimin që aty të luhet ndeshja Shqipëri-Francë. Miq gazetarë dhe sportdashës, ju mirëpresim në stadiumin e ri kombëtar për ndeshjen kualifikuese kundër Francës”, tha Andi Verçani.
