Dhuna në Kamëz ndaj arbitrit Hamiti ka sjellë pasoja të rënda për skuadrën e Kamzës e cila u përjashtua nga Superliga dhe do të luaj në Kategorinë e Dytë sezonin e ardhshëm. Por jo vetëm kaq, dënime ka pasur edhe për drejtuesit e skuadrës, të cilët janë arrestuar vetëm pak orë pas ngjarjes së turpshme.
Bashkim Arbitrave Shqiptar të Futbollit një ditë më parë njoftoi se ata do të tërhiqeshin nga kompeticioni dhe se nuk do të merrnin përsipër të zhvillonin asnjë ndeshje për aq kohë sa jetët e tyre rrezikoheshin.
FSHF ka lajmëruar ditën e sotme edhe zyrtarisht se këtë fundjavë nuk do të ketë futboll në vendin tonë. Në një njoftim për shtyp, institucioni më i lartë i futbollit në vend bën të ditur se kjo vjen si rrjedhojë e vendimit të marrë nga Bashkim Arbitrave Shqiptar të Futbollit. Më poshtë njoftim i plotë:
Federata Shqiptare e Futbollit ju bën me dije se të gjitha ndeshjet e kampionatit kombëtar të futbollit të planifikuara këtë fundjavë nuk do të zhvillohen si rrjedhojë e vendimit të marrë nga Bashkimi Arbitrave Shqiptar të Futbollit (BASHF) për të bojkotuar të gjitha ndeshjet deri në rikthimin e Policisë së Shtetit në stadiume.
FSHF shpreh mbështetjen maksimale ndaj të gjithë trupës arbitrale në Shqipëri dhe vlerëson e respekton vendimin e marrë prej tyre. Ne kërkojmë reagimin e të gjithë aktorëve për të larguar përfundimisht dhunën, për të garantuar rendin dhe sigurinë publike në stadiume, si parakushti themelor për të pasur një garë të shëndetshme dhe brenda standardeve.
