Ministrja e Arsimit, Evis Kushi, ka zhvilluar një takim me drejtuesit e rrjeteve profesionale, lidhur me skandalin ku lagjia e të pasurve në periferi të Tiranës, iu paraqit fëmijëve në librin e historisë së klasës së katërt si modeli i fshatit shqiptar. Ajo ka njoftuar se do të ketë rishikim të teksteve shkollore. Drejtuesit kryesorë të rrjeteve profesionale, së bashku me stafet e specializuara, do të rishikojnë në detaje të gjitha tekstet në arsimin tonë parauniversitar.
“Nisur nga shqetësimet e ngritura së fundmi në lidhje me ndonjë pasaktësi apo pasqyrim jo të përshtatshëm të realitetit në tekstet tona mësimore, zhvilluam në MAS një takim me drejtuesit kryesorë të rrjeteve profesionale, të cilët u angazhuan që së bashku me stafet e specializuara të rishikojnë në detaje të gjitha tekstet në arsimin tonë parauniversitar.
Para pak vitesh ne kemi realizuar një reformë të thellë, duke u dhënë mundësi nxënësve tanë që të mësojnë me tekste më cilësore, por puna do të vazhdojë pa u ndalur për të garantuar standarde të larta dhe cilësi në të gjitha aspektet e procesit mësimor”, tha ministrja.
Në materialin e ofruar në librin e historisë, realiteti i fshatrave shqiptarë përshkruhet jashtë çdo realiteti të periferisë së vendit.
“Pothuaj të gjithë shtëpitë e fshatit janë bërë të reja. Rruga automobilistike të çon drejt e në qendër të fshatit. Me rrugë të aslfaltuara, ai lidhet jo vetëm me qytetin, por edhe me fshatrat të tjerë”, thuhet në përshkrimin e tekstit të historisë së klasës së katërt.
