Greqia do të rrisë bashkëpunimin ushtarak me Shtetet e Bashkuara të Amerikës. Parlamenti grek ka miratuar një pakt të ri të mbrojtjes, e cila i lejon ushtrisë greke një fushë më të gjerë bashkëpunimi dhe aktivitetesh të përbashkëta me atë të SHBA-së.
“Ky pakt është për përfitimin e ndërsjellë të mbrojtjes sonë dhe ekonomive tona. Në një kohë kur ne jemi duke marrë kërcënime ndaj sovranitetit tonë, ne po kërkojmë mbështetjen e aleatëve tanë”, tha ligjvënësi konservator, Ioannis Lambropoulos.
Në një kohë që marrëdhëniet me Turqinë kanë kapur një pikë kulmore tensioni, marrëveshja e re i jep mundësinë Greqisë që të lejojë prezencë më të madhe të trupave amerikanë në vend. Kryesisht pakti parashikon përmirësime të infrastrukturës në bazën detare në ishullin e Kretës.
Marrëveshja e re përditëson një dokument të nënshkruar për herë të parë në vitin 1990, kur kryeministër ishte babai i kryeministrit aktual, Kyriakos Mitsotakis.
