Në Kinë është ngritur sërish alarmi për një shpërthim të mundshëm të koronavirusit, teksa në Wuhan dhe Shulan janë regjistruar disa raste të reja infektimi.
Pas rritjes së rasteve të reja në Shulan, Kina ka vendosur për mbylljen e këtij vendi. Në qytet u konfirmuan 11 raste të reja gjatë ditës së shkuar, të gjitha të lidhura me një grua të infektuar, e cila punonte në një lavanderi.
Sipas mediave të huaja, 45-vjeçarja e cila ka pasur një histori udhëtimi së fundmi dyshohet të ketë infektuar burrin e saj, motrat dhe disa anëtarë të tjerë të familjes.
Të gjitha vendet publike në këtë qytet janë mbyllur dhe banorëve u është thënë të qëndrojnë në shtëpi. Transporti publik është pezulluar dhe Shulan është klasifikuar si vend me rrezik të lartë për përhapjen e virusit.
Shulan ndodhet në provincën Jilin, dhe ndodhet në kufirin me Korenë e Veriut, e cila pretendon se nuk ka raste me Covid-19.
Kina tashmë ka dalë edhe prej listës së 10 vendeve të prekura në botë, duke u renditur e 11-ta pas SHBA-ve, Spanjës, Italisë, Mbretërisë së Bashkuar, Rusisë, Francës, Gjermanisë, Brazilit, Turqisë dhe Iranit.
Deri më tani Kina numëron 82,918 raste të reja dhe 4,633 viktima. Vetëm 141 raste janë ende aktive në Kinë, pasi shumica e pacientëve janë shëruar.
