Në përfundim të tryezës së Reformës Zgjedhore, deputetja e opozitës Rudina Hajdari deklaroi se u diskutua për aplikimin e teknologjisë në zgjedhjet e ardhshme. Ajo propozoi që kandidatët për deputetë apo kryebashkiak, të verifikohen që të mos jenë bashkëpunëtorë të Sigurimit të Shtetit.
“Ka ardhur koha që ne ta hedhim këtë hap. Mendoj se ky është hap shumë i mirë dhe u gjet një dakordësi për këtë propozim. Kjo do të pastrojë njëherë e mirë politikën nga ata persona që kanë pasur gisht në internimin dhe vrasjen e shumë shqiptarëve gjatë regjimit komunist.
Kemi bërë një hap të mirë për të pastruar politikën nga ish-komunistët. Ramë dakord për përdorimin e teknologjisë në zgjedhjet e ardhshme.
Mbledhjen e ardhshme do të flasim për ndryshimin e sistemit. Kemi ndarë nevojën për të rritur sigurinë e votimit, të evitohet manipulimi. Kërkuam përdorimin e teknologjisë në zgjedhje, eviton çdo lloj kostoje”, tha Hajdari.
Hajdari ka propozuar ndryshim të Kodit Zgjedhor. Në propozimet e saj dërguar kryetarit të Kuvendit, Gramoz Ruçi, theksohet verifikimi i figurave publike, duke synuar sipas saj transparencë, besueshmëri në zgjedhjet e përgjithshme.
Ndërkohë, përfaqësuesi i LSI, Petrit Vasili, deklaroi se u diskutua për identifikimin, votimin dhe numërimin elektronik, me synim shmangjen e manipulimit të votave.
“Opozita e bashkuar është me të njëjtin vullnet, kemi punuar shumë. Jemi përballë një momenti kyç për hapjen e negociatave. Krimi zgjedhor është i pajustifikueshëm. Luftimi i tij, kusht për hapjen e negociatave”.
