Franca ka konfirmuar rastin e parë të variantit të ri të koronavirusit që u zbulua në Britaninë e Madhe. Lajmi u bë i ditur të premten, nga zyrtarët shëndetësorë francezë, shkruan CNN.
Personi i infektuar është një shtetas francez që jeton në Britani. Ai u largua fundjavën e kaluar nga Londra për në qytetin francez Tours, dhe më pas u shtrua në spital për të marrë mjekimin e duhur.
“Personi është asimptomatik ndaj COVID-19, aktualisht ai gjendet i izoluar në shtëpi dhe është mirë”, thuhet në deklaratën e ministrisë së shëndetësisë franceze.
Varianti i ri i koronavirusit i cili u identifikua për herë të parë në Britaninë e Madhe, tashmë është identifikuar edhe në disa vende të tjera të botës.
Ekspertët vlerësojnë se ky variant mund të jetë më i transmetueshëm dhe ngjitës se llojet e tjera. Ende nuk dihet shkencërisht nëse vaskinat e prodhuara mund të kenë efekt ndaj këtyre mutacioneve.
