Lionel Messi u detyrua që të lëri në minutën e 25’ ndeshjen ndaj Sevillas, e cila u fitua nga Barcelona me rezultatin 4-2. Por frika është se çfarë do të ndodhë tani me Messin, i cili u raportua se kishte thyer krahun dhe do të mungojë në tre ndeshje mjaft të rëndësishme të katalanasve.
E përditshmja katalanase Sport.es ka mundësuar disa foto të “yllit” argjentinas, i cili shfaqet me krahun e futur në allçi, që do të thotë së lëndimi në minutën e 26-të të sfidës me andaluzët, pasi kishte shënuar një gol, ishte vërtet i rëndë. Diagnoza është e qartë, por ky është një lëndim, që mund të rezultojë i pabesë. Mjekët e klubit kanë zgjedhur një trajtim pa kirurgji, por procesi mund të zgjasë përtej tri javëve.
Ekzistojnë disa mjekë jashtë klubit, që mendojnë se tri javë janë shumë pak për riaftësimin e plotë. Gjithashtu, në Barcelonë, lojtari është përjashtuar nga tri ndeshjet e mëdha të javëve të ardhshme: Barça-Inter (24.10.2018); Barça-Real Madrid (28.10) dhe Inter-Barça (06.11). Gjithsej, do të jenë gjashtë ndeshje, që argjentinasi do t’i humbasë.
Që nga sezoni 2005-2006, Messi ka pësuar 19 lëndime, i 20-ti kundër Sevillas. Në vitet e para, Barcelona e ka ndier më shumë mungesën e Leos, por në kohët e fundit ka qenë në gjendje ta përballojë më mirë mungesën e tij.
“Pleshti” pritet të rikthehet në fushë në mesin e nëntorit, përpara sfidës së rëndësishme kundër Atletico Madrid në “Wanda Metropolitano”. Natyrisht që ky është një lajm dëshpërues për trajnerin Valverde, që do të duhet të bëjë pa lojtarin më të mirë të ekipit, në një fazë mjaft të rëndësishme të sezonit, ku do të përballet me kundërshtarë të një niveli të lartë.
