Në bazë të një propozimi të fundit të Komitetit Teknik të Ekspertëve për Covid-19, universitetet do të mbyllen për një muaj, dhe mësimi do jetë vetëm online. Por studentët e kanë kundërshtuar në mënyrë kategorike.
Aktualisht studentët janë duke protestuar sot në tre pika të ndryshme të kryeqytetit, një pjesë te kryeministria, një pjesë te Ministria e Arsimit dhe një pjesë tjetër pranë Ministrisë së Shëndetësisë, pasi kundërshtojnë vendimin që mësimi të jetë online.
Një përfaqësi e studentëve kanë hyrë në ambientet e Ministrisë së Shëndetësisë, ku kanë dorëzuar një listë me kërkesa, ku kryesorja mbetet ajo e marrjes së mësimit të alternuar, online dhe fizikisht.
Kërkesat e depozituara me shkrim nga ana e studentëve:
Mësimi i alternuar mes online dhe auditoreve, leksionet online, seminaret në auditore.
Rimbursimi i pagesës së konvikteve dhe qerave
Paketat e internetit falas dhe të dedikuara për studentët
Mundësim i paisjeve teknologjike të nevojshme për studentët që nuk kanë akses në mësim.
Nga ana tjetër, policia ka paralajmërur se tubimet janë të paligjshme në këtë kohë pandemie, dhe iu kanë bërë thirrje të shpërndahen. Studentët pretendojnë se jo të gjithë kanë mundësi të sigurojnë pajisje teknologjike, për zhvillimin e mësimit online.
