Ish-kryeministri Berisha është revoltuar pas një fotoje të shpërndarë nga kryeministri Rama krahë George Soros. Rama zbuloi në rrjetet sociale se është takuar në Shtetet e Bashkuara të Amerikës me George Soros, ndërsa postoi edhe një foto teksa shihej me të në New York.
“Në Nju Jork me mikun e çmuar George Soros, një mendje e rrallë dhe një mbështetës i palëkundur i Shoqërisë së Hapur”, ka shkruar Rama bashkëngjitur fotos në fjalë.
Ish-lideri demokrat, Sali Berisha, ka reaguar ashpër i nxitur nga publikimi i fotografisë së shefit të qeverisë me George Soros.
Berisha ka publikuar në rrjetet sociale dy fotografi në profilin e tij në Facebook, atë të Vjosa Osmanit me Bill Klinton dhe të Edi Ramës me George Soros. Ai thotë se Klinton është burrë i madh i kombit shqiptar, që udhëhoqi betejën e NATO-s për çlirimin e Kosovës.
“Nje foto me dy antipodet e historise se kombit shqiptar! Presidentja e Kosoves Vjosa Osmani me ish presidentin Bill Klinton, burrin e madh te kombit amerikan qe udhehoqi betejen e NATO-s per çlirimin e Kosoves. Ne anen tjeter Zografi bis me nje armik tjeter te kombit shqitar, multimiardierin George Soros qe rikthyen kontrollin e shoqerise civile dhe te sistem te drejtesise nga partia shtet ne Shqiperi dhe se bashku me serbomadhin Vuçiç projektuan ndarjen e Kosoves, vendosjen e hegjemonise serbe ne rajon. Sb”, shkruan Berisha.
