Mediat italiane kanë publikuar disa foto nga porti i Barit, ku shihen disa makina funeralesh të cilat presin në radhë për t’u imbarkuar në tragetin për në Shqipëri.
Sipas këtyre mediave, në makinat ndodhen trupat e shtetasve shqiptarë që kanë humbur jetën nga COVID-19 në shtetin fqinj.
“Antenna Sud” shkruan se këto pamje janë realizuar dy ditë më parë, në portin e Barit.
“Coronavirus, udhëtimi i fundit drejt shtëpisë. Këtu në Itali kishin gjetur punë, kishin realizuar një ëndërr. Sonte nga porti i Barit pamjet dramatike të makinave funerale me shtetas shqiptarë viktima të pandemisë. Ata do të ngjiten në tragetin Marina drejt Durrësit për lamtumirën e fundit”, shkruan media italiane.
Ende nuk ka asnjë të dhënë se sa është numri i shqiptarëve që kanë humbur jetën, si pasojë e koronavirusit në Itali.
