Komiteti Ndërsektorial për Mbrojtjen e Shëndetit nga produktet e duhanit miratoi sot imazhet e reja që do të vendosen në paketat e duhanit që do të shiten në Shqipëri.
Këto imazhe priten të vendosen në paketa dy vite pas miratimit. Kjo me qëllim që t’i lërë kohën e nevojshme biznesit për të bërë ndryshimet e posaçme.
Ministrja e Shëndetësisë, Ogerta Manastirliu tha se imazhet do të zënë 65% të faqes ballore të paketimit të duhanit.
“Ne propozuam që të përdornim imazhet që përdoren në Bashkimin Evropian, por nuk ishte e mundur për shkak se lejohet vetëm për vendet anëtare. Ndaj hulumtuam dhe morëm miratim nga Australia dhe Kanadaja për të përdorur fotot paralajmëruese në paketimet e duhanit. Paralajmërimet e kombinuara tekst dhe figurë do të zënë 65% të faqes ballore të paketimit të duhanit dhe po ashtu të faqes së pasme, duke zbatuar Direktivën 2014/40 EU”, tha Manastirliu, e pranishme në mbledhjen e sotme.
