Një jaht luksoz u gjet i braktisur ditën e djeshme rreth 12 milje larg bregut në Shëngjin, ndërsa ende nuk ka informacion rreth pronarit.
Brenda jahtit 13 metra të gjatë është gjetur dokumentacioni i rregullt dhe një pasaportë, që i përket turkut Sevgin Yavuz, 31 vjeç. Ai është një biznesmen i famshëm, që ka ardhur për pushime në Adriatik. Mirëpo, mbetet mister fakti se si jahti ka përfunduar 12 milje larg bregut në Shëngjin.
Ndërkohë, policia ka mësuar se Sezgin Javuz ka qenë i vetëm në jaht, në momentin kur është nisur nga porti i Tivarit.
Burime nga grupi hetimor bëjnë me dije se po hetohet në disa pista, ndërsa dyshimet ekzistojnë se turku mund të ketë pësuar atak kardiak teksa është hedhur në det për notim apo ndonjë largim i mundshëm i jahtit në momentin kur ai është hedhur për t’u larë.
Po ashtu, një ndër pistat ku po hetohet është dhe ajo e një pengmarrjeje të mundshme, për shkak të pasurisë së Javuz. Raportohet se biznesmeni nuk renditet në listat e zeza të policisë turke.
