Një ngjarje e rëndë është shënuar ditën e sotme në Kazakistan, teksa një aeroplan që transportonte pothuajse 100 njerëz u rrëzua pak sekonda pas ngritjes.
Sipas mediave të huaja, deri më tani raportohen të paktën 12 viktima dhe dhjetëra të plagosur. Aeroplani ishte planifikuar të fluturonte nga Almaty, qyteti më i madh i vendit, drejt kryeqytetit Nur-Sultan.
Në avion ndodheshin 93 pasagjerë dhe pesë pjesëtarë të ekuipazhit. Ngjarja u shënua në orët e para të mëngjesit, teksa raportohet se aeroplani humbi lartësinë pak sekonda pas ngritjes duke u përplasur me një mur betoni. Më pas ai është përplasur edhe me një ndërtesë dykatëshe.
Nga të dhënat e siguruara nga ‘Flightradar24’, bëhet me dije se avioni u rrëzua 19 sekonda pas ngritjes. Operacionet e shpëtimit filluan menjëherë, me 40 ekuipazhe të ambulancës të vendosura për të siguruar kujdesin mjekësor.
Një e mbijetuar i tha mediave lokale Tengrinews se ajo dëgjoi një “tingull të tmerrshëm” para se të rrëzohej avioni, raportoi Reuters.
“Avioni po fluturonte në një bordurë. Gjithçka ishte si në një film: duke bërtitur, duke bërtitur, njerëzit duke qarë”, tha ajo.
Një tjetër i mbijetuar tha që aeroplani filloi të binte në një anë menjëherë pas ngritjes.
“Në një moment ne filluam të binim, jo vertikalisht, por në një anë. Dukej sikur kontrolli mbi aeroplanin kishte humbur”, tha Aslan Nazaraliyev për Reuters.
Ministria e Punëve të Brendshme njoftoi se mes 12 viktimave ishte edhe piloti i avionit. 53 persona u dërguan në spitalin më të afërt për trajtim. Raportohet se të paktën 17 prej atyre që u shtruan në spital janë në një “gjendje jashtëzakonisht të rëndë”.
