Dy persona rezultojnë të zhdukur prej 7 ditësh në Tepelenë e Përmet. Bëhet fjalë për 32-vjeçarin Sokol Rama, banues në fshatin Mamaj të Tepelenës dhe shoku i tij Roland Milo nga fshati Miçan i Frashërit në Përmet.
Dy të rinjtë u deklaruan të zhdukur nga familjarët e tyre, fillimisht 32-vjeçari Rama e më pas Milo.
Por, kush janë dy të rinjtë dhe cilat janë dyshimet e para mbi zhdukjen e tyre?
Babai i dy fëmijëve të mitur është një emër i njohur për Policinë lokale. Ai është person me precedentë penalë, i akuzuar për vjedhje, ndërsa dyshimet janë se zhdukja e tij dhe shokut të tij nga Përmeti i deklaruar i zhdukur dy ditë pas denoncimit të familjarëve të Ramës, ka lidhje me transportin e lëndëve narkotike, pasi Rama është identifikuar nga Policia lokale si transportues droge.
Nga hetimet e deritanishme, forcat e Policisë ende një javë pas denoncimit të familjarëve, nuk kanë arritur të bien në gjurmët e tyre. Nga përgjimi i telefonave të Sokol Ramës policia arriti të bënte më herët identifikimin e sinjalit telefonik të njërit prej telefonave të përdorim të tij, në Frashër të Përmetit.
Ka dyshime se zhdukja e tyre mund të ketë ardhur si pasojë e prishjes së pazareve të drogës. Dyshohet se dy të rinjtë mund të jenë përfshirë në ndonjë incident gjatë transportimit të lëndës narkotike drejt Greqisë. Por, nga ana tjetër, nuk përjashtohet as mundësia që dy personat të jenë fshehur në këtë zonë të thellë malore, raporton BalkanWeb. Më poshtë foto të dy të zhdukurve.
Denonco ne TT