Gjatë këtyre javëve që Shqipëria është e izoluar, është vënë re në masë të madhe se qytetarët nuk duan t’iu binden urdhrave të policisë. Ndonëse në periudhë pandemie, shqiptarët janë kapur shpesh rrugëve duke shëtitur, ose duke lëvizur me biçikletë. Gjobat nuk kanë munguar nga ana e uniformave blu, por duket se kaq nuk mjafton. Policia e Shtetit do të nisë monitorimin me dron.
Dronet janë të pajisur edhe me magnetofon, që mund të përcjellin mesazhe audio, për të paralajmëruar kalimtarët.
Nga sot, fasha e orarit të lëvizjes do të përfshijë orën 05:00 deri në orën 17:30. Por në kuadër të forcimit të masave për koronavirusin, nga e premtja në orën 17:30 deri të hënën në orën 05:00, vendi do të jetë në izolim total. Leja për pazare nga e hëna në të premte do të jetë 90 minuta, për vetëm një anëtar të familjes.
Drejtori i Policisë së Shtetit, Ardi Veliu, ka kërkuar forcime në Drejtorinë e Policisë në Tiranë, Durrës, Shkodër dhe Vlorë, pasi në këto rrethe ka pasur raste më problematike.
Vendi do të futet në karantinë të plotë në fundjavë, dhe pritet që terreni të monitorohet me anë të dronit. Po kështu janë marrë masa edhe për policët, që të dizinfektohen në mënyrë të rregullt. Deri tani ka 8 policë të infektuar me Covid-19, por fatmirësisht nuk kanë komplikacione të rënda.
