Partia Demokratike dhe Partia e Lirisë kanë firmosur marrëveshjen e shkruar në lidhje me zgjedhjet lokale që pritet të mbahen më 14 maj të vitit 2023. Marrëveshja është konkretizuar pas takimit mes dy kryetarëve Sali Berisha dhe Ilir Meta, që u zhvillua një ditë më parë në selinë blu, në prezencën e sekretarit të përgjithshëm të Partisë Demokratike, Flamur Noka.
Pas nënshkrimit të marrëveshjes, kryetari i Partisë së Lirisë, Ilir Meta, është shprehur se kjo është një marrëveshje historike që mbështetet në parimet e demokracisë, transparencës dhe pluralizmit.
“Është marrëveshja më parimore që iu shërben qytetarëve, është një marrëveshje që na angazhon fuqimisht si PD, si PL në drejtim të garantimit të demokracisë direkte të qytetarëve.
Referendumet, primaret, llogaridhënia do të bëjnë të mundur që të kemi njëherë e përgjithmonë një sovran që i ka mjetet për të mbajtur nën kontroll të gjithë ato që i delegon pushtetin dhe abuzojnë me të për të shtypur qytetarët tanë.
Dua të shpreh kënaqësinë më të madhe që angazhimi që unë dhe PL, sot merr mbështetje të madhe nga PD përsa i takon ushtrimit të së drejtës kushtetuese të referendumeve.
Kjo është marrëveshje historike ku do të marrin fund bunkier-bashkitë, këto modele të nëpërkëmbjes së qytetarit, të shtypjes së tij dhe grabitjes së taksave të tyre ashtu siç ndodh çdo ditë dhe për taksat me inceneratorin.
Dua të shpreh bindjen se kjo është një marrëveshje e cila do të garantojë dhënien e fuqisë së munguar deri tani qytetarëve, pasi kjo fuqi u është marrë peng nga kapja e shtetit nga qeveria. Shpreh bindjen në fitoren e padiskutueshme të opozitës, në Tiranë në radhë të parë dhe në shumicën dërrmuese të bashkive të Shqipërisë.
Falenderoj PD për këtë mirëkuptim dhe ndaj bindjen se çdo forcë dhe çdo grupim opozitar gjen veten dhe është i përfshirë, pasi kjo është marëveshje që udhëhiqet nga parimet e demokracisë, transparencës dhe gjithëpërfshirjes. Shpreh bindjen se kjo është marrëveshje historike, që do të kontribojë në përfshirjen e mbarë qytetarëve të cilët do të ndihen pjesë e politikbërjes shumë shpejt”.
