Ambasadori i Shqipërisë, Ermal Muça dhe ministrja e Punëve të Jashtme në Kanada, Chrystia Freeland kanë firmosur një marrëveshje që i jep zgjidhje problemit te njohjes se kontributeve.
Qëllimi i kësaj marrëveshje është shmangja e mbulimit të dyfishtë për të njëjtën periudhë dhe bashkimi i periudhave të sigurimit të realizuara në dy vendet. Në bazë të marrëveshjes asnjë qytetar nuk do të humbasë asnjë ditë kontribute, pavarësisht se ku ka punuar, pasi bashkimi i periudhave do të bëjë të mundur plotësimin e kushteve ligjore për përfitimin e pensionit në të dy vendet.
Lajmi është bërë i ditur nga vetë ministrja e Kanadasë përmes një postimi në “Facebook”, duke postuar edhe fotot gjatë firmosjes.
“Marrëveshja për sigurimin social që nënshkrova sot me Ermal Muçën, ambasadorin e Shqipërisë në Kanada, do të ndihmojë kanadezët dhe shqiptarët që jetojnë në të dy vendet të kenë qasje më të mirë në pensionet e tyre”, shkruan ajo.
Nga nënshkrimi i kësaj marrëveshjeje do të përfitojnë rreth 60 mijë shtetas shqiptarë që jetojnë dhe punojnë në Kanada. Nënshkrimi përfundimtar i kësaj marrëveshjeje erdhi pas një periudhe të gjatë negociatash për njohjen reciproke të skemave të sigurimeve shoqërore dhe hartimit të marrëveshjeve administrative, duke nisur që prej vitit 2013.
