Filipine nuk gjen qetësi. Pas tërmeteve dhe përmbytjeve, tani kanë filluar të shpërthejnë edhe vullkanet. Autoritetet filipinase njoftuan se një prej vullkaneve më aktivë në vendin e tyre është “zgjuar”. Bëhet fjalë për vullkanin Taal, që ndodhet 70 km në jug të kryeqytetit, Manila.
Sipas raportimeve të BBC, vullkani ka shpërthyer në orët e parë të ditës së sotme, teksa para shpërthimit është formuar një re gjigante hiri. Menjëherë autoritetet kanë dhënë alarmin, nga niveli 3 në nivelin 4.
Deri tani janë evakuar 8 mijë persona për shkak të rrezikut. Taal është vullkani i dytë më aktiv në vend.
Edhe pse është një nga më të vegjëlit në botë, ky vullkan ka shpërthyer së paku 34 herë në 450 vitet e fundit raporton BBC.
“Vullkani Taal ka hyrë në një periudhë intensive të aktivitetit që e arriti kulmin me rrjedhje të lavës nga ora 2 e 49 deri në orën 4 e 28 të mëngjesit. Pritet një cunami vullkanik”, thuhet në deklaratën e Institutit për Vullkanologji dhe Sizmologji.
