Këtë 8 mars, gra e vajza marshuan në kryeqytet për më shumë të drejta, barazi dhe kundër dhunës. Në ditën ndërkombëtare të gruas, aktivistë të shoqërisë civile zhvilluan një tubim në formën e një marshimi, nga parku i liqenit drejt Kryeministrisë.
Me pankarta në duar, përfaqësues të organizatave në mbrojtje të grave, bënë thirrje për barazi gjinore dhe ndaljen e dhunës dhe diskriminimit. Protestuesit u ndalën përballë Kryeministrisë, ku u bashkuan edhe të rinjtë e ‘Organizatës Politike’.
Në Shqipëri, 8 marsi njihet si festa e nënës, se sa një ditë proteste. Për vite me radhë ajo është festuar në ambiente të ndryshme festive nga gratë e vajzat.
Ndërkohë në shumë vende perëndimore, 8 marsi shndërrohet gjithmonë në një ditë ku kërkohen me forcë të drejtat e grave.
Dita Ndërkombëtare e Gruas festohet më 8 mars çdo vit. Ajo përkujton lëvizjen për të drejtat e grave. Ndërsa respektimi i parë i Ditës së Gruas u mbajt më 28 shkurt 1909, në Nju Jork, 8 marsi u sugjerua nga Konferenca Ndërkombëtare e Gruas 1910, për t’u bërë një “Ditë Ndërkombëtare e Gruas”.
Pasi gratë morën të drejtën e votës në Rusinë Sovjektike më 1917, më 8 mars u bë një festë kombëtare atje. Dita u mbizotërua kryesisht nga lëvizja socialiste dhe vendet komuniste derisa u miratua në vitin 1975 nga Kombet e Bashkuara.
Ideja për “Ditën Ndërkombëtare të Gruas” u hodh fillimisht në fillim të shekullit të XIX-të, e cila ishte një periudhë e tronditur nga trazirat dhe shtimi i popullsisë, për botën e industrializuar.
8 marsi njihet si “Dita e Gruas”, në të gjithë botën. Madje në shtete të ndryshme kjo ditë festohet si festë kombëtare.
