Pas publikimit të disa videove ku shfaqet në shkelje të etikës, kryegjyqtarja e Elbasanit, Enkeleda Kapedani është vënë nën hetim nga Inspektori i Lartë i Drejtësisë. Në një profil në TikTok, Kapedani shihet duke dëgjuar këngë për mafien, teksa reklamon veshje dhe marka të shtrenjta. Videot e Kapedanit i janë përcjellë ILD, dhe më pas institucioni ka dërguar një njoftim ku tregon se është nisur hetimi disiplinor ndaj saj. Lidhur me këtë çështje, është diskutuar mbrëmjen e djeshme në emisionin “Opinion”.
Avokati i njohur Saimir Vishaj, ka nxjerrë “perlën” e radhës, ku tha se femra po s’u tund s’është femër. Saimir Vishaj dha këtë koment që po bën xhiron në rrjetet sociale, duke iu referuar videove që u bënë “hit” të kryegjyqtares Enkeleda Kapedani, e cila sfilonte në zyrat e shtetit, nën ritmin e këngës “Mafia”.
“Femra po s’u tund një çikë, s’është femër. Po lëri ato tashi. Nuk është mashkull ajo tani”, tha Vishaj, teksa komentonte në studio.
Deklarata e Vishajt është bërë virale në rrjet. Duke lënë të kuptohet se kjo video mund të jetë edhe një lloj presioni për çështjet që avokatja ka në dorë, Vishaj u shpreh se Kapedani duhet të dorëhiqet, në mënyrë që ky imazh të mos ndikojë në vendimarrjen e saj.
“Duhet te japë dorëheqjen, për t’ju nënshtruar hetimit dispilinor nga KLGJ, pa u ndikuar nga funksioni i saj. Nëse gjyqtarja ka një çështje të rëndësishme, duhet ta ruajmë derisa të japë një vendim. Nëse kjo gjyqtare ka dosje të nxehta në duar për rrethin e Elbasanit, ajo duhet të ngrijë vendimarrjen dhe të japë dorëheqje në mënyrë që kjo figurë sot të mos ndikojë në vendimarrjen e saj”, u shpreh Vishaj, duke bërë apel që çështja të zbardhet.
ILD ka dërguar një ekip të posaçëm në Gjykatën e Elbasanit. Ekipi i posaçëm i dërguar nga ILD, pritet të bëjë një inspektim në ambientet e Gjykatës së Elbasanit.
