Partia Socialiste do të mbledhë sot Kongresin, duke i hapur kështu rrugë nisjen e fushatës elektorale për zgjedhjet lokale të 30 qershorit. Sot pritet të trajtohen shumë çështje, si zbardhja e emrave për disa nga kandidatët që janë projektuar për të përfaqësuar socialistët në disa nga bashkitë kryesore të vendit, por edhe pritshmëritë që ka shkaktuar në publik ftesa dhe hapësira që PS iu ka lënë në Kongres ish-kryeministrave socialistë. Mes tyre bie në sy emri i ish-kryeministrit Fatos Nano, i cili ka udhëhequr PS si kreu i ekzekutivit në dy mandatet qeverisëse.
Sikundër është bërë me dije edhe më herët, Nano ka pranuar ftesën e drejtuar nga kupola e PS, ndërsa do të jetë pjesë e paneleve të diskutimit. Kujtojmë që me daljen nga skena politike, e cila daton në vitin 2005, Fatos Nano ka refuzuar ftesat që selia rozë ka drejtuar në adresë të tij, në disa nga aktivitetet kryesore partiake që ajo ka zhvilluar.
Me gjasë, prania e tij sot në Kongresin e PS do të trazojë ujërat e politikës në Shqipëri, pasi dalja e tij është një mesazh i qartë për kundërshtarët e Partisë Socialiste.
