Para dy ditësh u bë publik skandali për kurimin e të sëmurëve me Covid në spitalin “Shefqet Ndroqi”. Një vajzë ka paguar 8 milionë lekë për nënën e saj, e cila ishte e shtruar në këtë spital, me qëllimin shërimin e saj, por që kjo e fundit ka ndërruar jetë.
Prokuroria pranë Gjykatës së Shkallës së Parë Tiranë, ka regjistruar kallëzimin ndaj shtetases Tire Alldervishi, për kryerjen e veprës penale të “Mashtrimit”, e cila dyshohet se sillej si infermiere, ndërsa ishte sanitare në spitalin “Shefqet Ndroqi” në Tiranë.
Duke iu referuar njoftimit të Prokurorisë, kallëzimi është bërë nga vajza e viktimës, pasi sipas saj, i ka marrë disa shuma parash të konsiderueshme për t’i shërbyer mamasë së kallëzueses, e cila ishte e shtruar në spital me Covid-19, duke iu prezantuar si infermiere ndërkohë që ishte sanitare e spitalit.
Tire Alldervishi do të njihet sot me masën e sigurisë. Një ditë pas arrestimit të saj, sanitarja do të dalë para trupit gjykues, ku do të mësojë fjalën e togave të zeza.
Sanitarja, në dëshminë e saj as nuk ka mohuar dhe as nuk ka pohuar përfshirjen e saj në skandalin e denoncuar dy ditë më parë në emisionin “Stop”. Ajo mësohet të jetë shprehur përpara hetuesve se është e tronditur, por që do të flasë në një moment të dytë në lidhje me ngjarjen, shkruan “Dosja.al”.
“Nuk kam asgjë për të thënë. Jam e tronditur, do flas në një moment të dytë”, mësohet të ketë thënë Alldervishi para hetuesve.
