Zemra e nënës së kryeministrit Edi Rama pushoi së rrahuri mëngjesin e sotëm. Lajmin e trishtë e dha vetë kreu i qeverisë, përmes një postimi në Facebook. Një ditë më parë, kryeministri Rama përkujtoi ditën e lindjes së të atit, Kristaq Rama, që u nda nga jeta 22 vite më parë, ndërsa sot e ëma ndërroi jetë.
Aneta Rama la dy djem, Edin dhe Olsin, i cili është drejtor i ekipit të futbollit të Partizanit.
Kryeministri Edi Rama me anë të njoftimi të dytë bashkë me Olsi Ramën, u kanë dhënë një mesazh të afërmve dhe miqve të tyre. Duke i falenderuar për mesazhet e pafundme, ata kërkojnë mirëkuptim prej te gjithëve për pamundësinë e pritjes fizikisht të ngushëllimeve. Kjo sipas tyre, për shkak të situatës së krijuar nga pandemia.
Reagimi i fundit i Edi dhe Olsi Ramës
“Përulësisht u lutemi familjarisht mirëkuptim të gjithë të afërmve e miqve të mirë, për pamundësinë e pritjes së ngushëllimeve e të ceremonisë së përcjelljes së nënës sonë në banesën e fundit, në kushtet e detyrimit për të respektuar rregullat e mbrojtjes së shëndetit të gjithësecilit.
I falenderojmë të gjithë për mesazhet prekëse që vazhdojnë ta na vijnë për humbjen e nënës sonë të shtrenjtë, dhe e vlerësojmë shumë respektin e mirëkuptimin e kujtdo që do të donte të ishte edhe fizikisht pranë nesh në këtë ditë të vështirë. Edi dhe Olsi Rama”.
