Një romancë që nisi në spitalin e Gjirokastrës, përfundoi me një denoncim nga ana e familjarëve të vajzës dhe hedhjen në veprim të policisë për prangosjen e djalit. Një 34- vjeçar nga Tepelena ka përfunduar në prangat e policisë, pas denoncimit të familjarëve të një vajze 17-vjeçare se ka abuzuar seksualisht me të. Njohja e 17-vjeçares gjirokastrite me 34-vjeçarin nga Tepelena ka qenë rastësore dy ditë më parë në spitalin e Gjirokastrës. Ajo ndodhen në spital, pasi kishte të shtruar një familjar të saj.
Si fillim 34-vjeçari e ka ftuar për kafe adoleshenten, dhe të dy kanë udhëtuar me automjetin e tij në drejtim të Viroit. Në kabinën e automjetit ka pasur një raport intim mes të dyve.
Familjarët e vajzës janë shqetësuar, pasi ajo është vonuar. Ata i janë drejtuar rajonit të Policisë së Gjirokastrës, ku kanë denoncuar rastin në fjalë, duke marrë si shkas edhe dëshminë e vajzës te familjarët se 34-vjeçari e puthi dhe ndërmori veprime jo pa pëlqimin e të resë. Por ndryshe nga familjarët, e reja nuk ka pranuar të bëjë denoncim për këtë rast. Sakaq, policia ka arrestuar 34-vjeçarin, i cili nga ana e tij ka deklaruar se raporti i lindur me të renë ka qenë nga ana e të dyve, dhe jo veprim i dhunshëm.
“Specialistët e Seksionit të Hetimit të Krimeve në Komisariatin e Policisë Gjirokastër, bënë ndalimin e shtetasit E. G., 34 vjeç, banues në Tepelenë, pasi dyshohet se ka ngacmuar seksualisht një shtetase të mitur 17 vjeçe”, sqaroi policia lokale. Materialet në ngarkim të shtetasit të mësipërm, i kaluan Prokurorisë pranë Gjykatës së Shkallës së Parë Gjirokastër për veprën penale “Ngacmim seksual”.
