Katër shtetas shqiptarë dhe dy shtetas grekë janë arrestuar në pikën kufitare të Kakavijës, në 24 orët e fundit.
Sipas policisë greke, ata akuzohen se kanë falsifikuar formën e posaçme që nevojitet për kalimin në pikat kufitare, PLF.
Personat e arrestuar kanë tentuar të kalojnë në doganë pa plotësuar më parë formularin e nevojshëm. Pasi janë sqaruar prej policisë se nuk mund të udhëtojnë pa plotësuar më parë formularin janë kthyer mbrapsht.
Pak orë me vonë, të njëjtët persona, kanë paguar shtetasit grekë me origjinë shqiptare, të cilët punojnë si taksistë piratë mes dy vendeve, për t’u pajisur me formularë të falsifikuar dhe tentuan të kalojnë sërish në pikën kufitare në bordin dy furgonëve me targa greke.
Pas verifikimeve të kryera në sistem u konfirmua se të arrestuarit në vend të plotësonin formularin sipas ligjit e kanë falsifikuar atë. Ata janë penalizuar me gjoba nga 150 në 5000 euro dhe u lanë të lirë me kusht.
