Organizata Botërore e Shëndetësisë ka konfirmuar se tashmë Evropa ka zëvendësuar Kinën, si epiqendrën e pandemisë së koronavirusit. Drejtori i OBSH-së, Tedros Adhanom Ghebreyesus është shprehur se në Evropë “po raportohen më shumë raste çdo ditë, sesa raportoheshin në Kinë në kulmin e epidemisë”.
Po kështu, në Shqipëri janë shtuar rastet e reja me koronavirus. Gjatë 24 orëve të fundit janë shtuar 4 raste te reja, duke e çuar në 42 raste numrin e të prekurve. 3 prej tyre janë në terapi intensive.
Sikundër është thënë shpesh gjatë ditëve të fundit, masë parandaluese për përhapjen e Covid-19 është qëndrimi në shtëpi. Për të mbrojtur veten dhe të tjerët nga koronavirusi, ndiqni hapat e mëposhtëm:
Mos u jepni dorën njerëzve, mos u puthni dhe përqafoni. Mjaftohuni me një përshëndetje. Vendosni maskë dhe doreza kur dilni nga shtëpia. Tregohuni të kujdesshëm në momentin që do të duhet t’i hiqni, pasi virusi mund të gjendet në sipërfaqen e tyre. Mos prekni gojën, sytë dhe hundën! Dezinfektoni duart nëse jeni rrugës për diku, dhe lajini me ujë dhe sapun sapo të keni mundësi.
Po kështu, distancohuni nga njerëzit. Më e mira do të ishte të mbanit një distancë prej 2 metrash, por në pamundësi qëndroni të paktën 1 metër larg. Mos shkoni në supermarket nëse shihni që ka shumë njerëz. Prisni radhën jashtë. Ajrosini rrobat përpara se t’i vendosni në dollap. Mos i shkundni.
