Gjatë muajit tetor, çmimi i energjisë elektrike do të mbetet i pandryshuar për konsumatorët, pasi ERE ka pezulluar vendimin për vendosjen e fashës 800 KW/h.
“Çmimi i KESH për OSHEE nuk do të ndryshojë. Çmimi i energjisë do vijojë të jetë i pandryshuar. ERE ka marrë vendimin mbi legjislacionin”, tha kreu i bordit Petrit Ahmeti.
Kjo mbledhje vjen pasi qeveria vendosi mos aplikimin e fashës për abonentët familjarë. Kryeministri Rama deklaroi se fasha 800 KW do të vendoset në muajin nëntor, duke parë parametrat, ose do të ketë sërish diskutim për shtyrje të aplikimit të saj.
Qeveria në studimin e saj para se të ndërmerrte këtë nismë, llogariti se mesatarisht nga ky vendim preken rreth 40 mijë familje. Por ky numër pritet të jetë edhe më i madh gjatë muajve të dimrit, kur edhe konsumi i energjisë rritet për shkak se ajo përdoret edhe për ngrohje.
