Presidenti turk Recep Tayyip Erdogan është pritur në një takim në Shtëpinë e Bardhë nga presidenti Donald Trump.
Mësohet se dy liderët do të flasin për ndërhyrjen ushtarake në Sirinë veriore dhe blerjen nga Turqia të një sistemi rus të mbrojtjes ajrore. Ndërkohë pas takimit pritet të mbahet edhe një konferencë e përbashkët për shtyp nga dy udhëheqësit.
Kujtojmë se SHBA-të dhe aleatët e NATO-s janë shprehur të shqetësuar në lidhje me blerjen e sistemit rus të raketave S-400, nga Turqia. Sipas tyre, ky sistem nuk përputhet me sistemet mbrojtëse të aleancës dhe se përbëjnë rrezik për programin amerikan të avionit luftarak F-35.
Nga ana tjetër, përmes një postimi në Twitter, zëdhënësi i Presidentit Erdogan, Fahrettin Altun, tha se Turqia ka qenë e qartë për arsyet e blerjes së raketave ruse.
“Nevoja e Turqisë për një sistem mbrojtjeje me raketa është urgjente. SHBA-ja duhet ta pranojë këtë dhe të mos lejojë dëmtimin e marrëdhënies tonë. Pjesëmarrja e Turqisë në programin e avionit F-35 është jetësore për partneritetin tonë të mbrojtjes”, shkruan ai në postimin e tij.
