Nafta duket të jetë sektori ku Shqipëria ka bërë më pak përparim lidhur me përafrimin e legjislacionit dhe plotësimin e detyrave të lëna nga Plani i Veprimit një vit më parë, ndërsa mjafton të rikujtojmë situatën që po përjetojnë naftëtarët në rafineritë e Fierit dhe të Ballshit.
Kolapsi financiar i kompanisë së ARMO, ka nxjerrë në rrugë 1200 naftëtarë, ku ndaj të cilëve edhe Ministria e Energjetikës ka propozuar dhënien e një asistence konkrete deri në kohën e gjetjes së një zgjidhje konkrete.
Pavarësisht interpelancës së mbajtur me kryeministrin, naftëtarët e ARMO nuk kanë marrë premtim për zgjidhjen e situatës, ndërsa vetë Rama ka porositur që të nxitojnë për përfitimin e statusit të naftëtarëve. Në sektorin e energjisë, Shqipëria ka patur një rritje të qëndrueshme falë reshjeve të shumta dhe për pasojë ka ndikuar në përmirësimi e situatës hidrike në vend.
Përfaqësuesi i Sekretariatit të Komunitetit të Energjisë, Janez Kopac, raportoi në Komisionin e Veprimtarisë Prodhuese ku bëri një përmbledhje të ecurisë së vendit në disa aspekte gjatë vitit 2017. Sekretariati ka nënvizuar se energjia tashmë ka hyrë në rrugën e reformimit prej kohësh, por mbeten ende të paplotësuara disa aspekte dhe për këtë ka nxjerrë edhe konkluzionet-Monitor.
“Aktet ligjore sekondare duhen përditësuar dhe miratuar sipas ligjit, përfshirë rregullat e balancimit/kodin e rrjetit të OST. Duhet përfunduar certifikimi i OST, në bashkëpunim me Sekretariatin si dhe të përfundojë ndarja e OSHEE (duke përfshirë një program pajtueshmërie). Çmimet e KESH dhe OSHEE të liberalizohen plotësisht, DSP (furnizuesi publik) të përdoret në mënyrë të veçantë dhe të kufizuar, në përputhje me ligjin” thuhet në raport.
Lidhur me naftën, Shqipëria ende nuk ka vënë në zbatim pjesën që lidhet me rezervat e emergjencës.
“Janë gati dy projektligje, me shumë pak ndryshime, në lidhje me mbajtjen e rezervave emergjente të naftës. Megjithatë, nuk janë marrë ende vendime përfundimtare se cili është projektligji më i përshtatshëm. Sekretariati ka përgatitur, në nëntor 2015, përllogaritjet kryesore për Plan Veprimin. Nuk është bërë aspak progres sa u takon përparësive të identifikuara në Raportin Vjetor të Zbatimit të vitit të shkuar”, – vlerëson Sekretariati.
Në përparësitë kryesore në sektor, Sekretariati vlerëson pikërisht miratimin e ligjit përfundimtar për mbajtjen e rezervave të naftës.
Informimi deputetëve
Sekretariati ka vlerësuar se është e rëndësishme që deputetët, si vendimmarrësit kryesorë, duhet të informohen më mirë për çështjet e energjisë.
“Fuqizimi i deputetëve në mënyrë që të kenë njohuritë e duhura për të miratuar ligjet përkatëse dhe të mbikëqyrin më me efikasitet politikat e qeverisë në lidhje me energjinë. Të informohen mbi situatën aktuale të zbatimit, në vendet e tyre, të acquis të Komunitetit të Energjisë . Pjesëmarrja e Ekspertëve të Sekretariatit në grupet parlamentare të punës, në seanca dëgjimore dhe konferenca.”
