Zbardhen detaje të reja nga atentati i djeshëm në Shkodër, ku mbeti i plagosur 32-vjeçari, Taulant Ahmeti.
Nga hetimet e kryera rezulton se 23-vjeçari, Gledis Ustabeqiri dhe shoku i tij, Hygert Muçaj, teksa lëviznin me makinë i kanë bërë pritë të riut.
Ata kanë pritur sa 32-vjeçari ka zbritur nga makina dhe aty i janë afruar me armë në dorë. Ahmeti ka bërë rezistencë, duke bërë që njëri prej atentatorëve ta qëllojë në kokë me shufër hekuri.
Por kjo nuk e ka ndaluar Ahmetin që t’i bëjë sërish rezistencë dy të rinjve. Në këtë moment 23-vjeçari, Gledis Ustabeqiri ka qëlluar me armë, por fatmirësisht plumbat nuk e kanë prekur.
Ngjarja u zbulua nga dëshmia që Ahmeti ka dhënë në polici, ndërsa ende nuk dihet motivi që çoi në këtë ngjarje. Ndërkohë, Gledis Ustabeqiri dhe shoku i tij, Hygert Muçaj janë shpallur në kërkim nga policia.
