Prej dy vitesh një hetim i kryer nga ana e autoriteteve britanike, ka çuar në burgosjen e 5 shqiptarëve. Policia në Sussex, Britaninë të Madhe, kundër 5 shqiptarëve ka dhënë masën 67 vjet burg në total.
Më 27 Shtator nga gjykata e Hove, u dhanë dënimet për shqiptarët Leonard Agën, Ilir Vakajn, Hysni Tafën, Ilir Hasanaj dhe Kujedesi Pistën. Të gjithë akuzoheshin për trafik droge dhe pastrim parash dhe ishin drejtuesit e një grupi që kishte trafikuar më shumë se 120 kilogramë kokainë në qytet.
Autoritetet në Sussex për këtë grup të organizuar kriminal , janë shprehur që përdorte linja telefoni jashtë zonave të mëdha urbane për të shitur drogën.
Në gjuhën angleze kjo teknikë është quajtur “County line”, dhe përdoret nga individë apo edhe grupe të cilët përdorin linjat telefonike për të zgjeruar biznesin e tyre të drogës në zona të reja, larg vendit ku banojnë, zakonisht në zona urbane me transport të mirë publik.
Gjykatësi David Rennie ka folur për secilin prej anëtarëve të kësaj bande. Nga ana tjetër një zëdhënës i policisë tha se shqiptari Leonard Aga, 35-vjeç, i vetëpunësuar dhe me banim në Essex pranoi akuzat e shpërndarjes së kokainës, pastrimit të parave, posedim kokaine dhe dokumente identiteti false. Ai u dënua me 10 vjet burg dhe u cilësua nga autoritetet si personi me rol domethënës në këtë rrjet kriminal.
Ndërkohë 35-vjeçari Ilir Vakaj, u dënua me 16 vjet burg, Ilir Hasanaj, 31-vjeç, u dënua me 17 vjet. 46-vjeçari Hysni Tafa, me profesion ndërtues dhe Kujedesi Pista, 36-vjeç u dënuan të dy me nga 12 vjet burg.
“Ajo që qëndron në zemër të kësaj çështjeje gjyqësore është një grup i organizuar kriminal i drejtuar nga ju, shqiptarët. Ky ishte një grup i disiplinuar, i mirë organizuar dhe i sofistikuar kriminal. Veprimet tuaja ishin të turpshme dhe tregtia e neveritshme. Shumë jetë të rinjsh u shkatërruan vetëm që anëtarët e grupit tuaj kriminal të mund të lulëzonin. Fatkeqësisht për ju, ju tërhoqët vëmendjen e një grupi detektivësh të cilët gjithashtu ishin të mirë disiplinuar, të organizuar dhe të sofistikuar. Në këtë rast policia fitoi dhe ju humbët. Ju do të shkoni të gjithë në burg për një periudhë të konsiderueshme kohe”, tha Rennie.
Ndërsa, ndaj 19 anëtarëve të tjerë të grupit, roli i të cilëve ishte që të shpërndanin drogë në rrugë, u dënuan më herët me mbi 5 vjet e gjysmë burg.
Hetuesit shpjeguan se fillimisht kur nisën hetimet për grupin shqiptar besohej se ata kishin kontaktuar me 319,465 linja të drogës. Këto kontakte përfaqësonin përafërsisht 6,397 klientë të ndryshëm në zonën e Brighton dhe Hove, e barazvlefshme me 155,838 shitje kokaine. Gjatë periudhës që ishin nën hetim, grupi përllogaritet se kishte shitur 106-165 kilogramë kokainë, vlera e së cilës shkonte mbi 6.5 milion paund.
