Kuvendi vendosi ditën e sotme për shkarkimin e Presidentit të Republikës, Ilir Meta. Nga 114 deputetët e pranishëm në sallë, 104 votuan pro, 7 kundër dhe 3 abstenim.
Mësohet se deputetë të cilët votuan kundër shkarkimit të Metës janë, Lefter Maliqi, Adriatik Alimadhi, Artur Roshi, Elda Hoti, Fatjona Dhimitri, Suzana Topi dhe Gjetan Gjetani.
Sipas Komisionit hetimor, Meta ka kryer 9 shkelje, duke nisur që nga betimi i tij si president, te cënimi i procesit zgjedhor, i marrëdhënieve me partnerët strategjikë të Shqipërisë, imazhit dhe reputacionit të vendit, cënimi i figurës së vetë institucionit të Presidentit apo dhe abuzim me kompetencat kushtetuese të Presidentit.
Tashmë pritet Gjykata Kushtetuese për të marrë vendimin final mbi fatin e Kreut të Shtetit. Kjo është nisma e dytë përmes një komisioni të dytë hetimor që ngrihet për hetimet e shkeljeve kushtetuese për Metën brenda 2 viteve, ku mazhoranca kërkonte shkarkimin e tij nga detyra.
