Sot është një biznesmen 46-vjeçar dhe sipas revistës “Forbes”, ka një pasuri personale prej rreth 21 miliardë dollarësh. Por Elon Musk nuk lindi miliarder, dhe jeta e tij e hershme nuk ka qenë një fushë me lule. I lindur në Pretoria të Afrikës së Jugut, nga një baba vendas dhe një grua kanadeze, ai u rrit kryesisht në Afrikën e Jugut.
Kur ishte fëmijë, ishte viktimë e bullizmit. Në një rast e sulmuan, e goditën, dhe e hodhën nga shkallët. Kur ishte 9 vjeç nisi të merret me programimet në kompjuter dhe 2 vite më vonë krijoi lojën e parë, “Blastar”.
Pasi përfundoi shkollën e mesme, Musk u zhvendos në Kanada ku nisi studimet universitare. Punoi me kohë të pjesshme për të mbështetur veten dhe mbijetoi edhe me 1 dollarë në ditë, duke e kufizuar dietën e tij kryesisht me sanduiçë dhe portokalle. Edhe kur u zhvendos në SHBA, jeta nuk ishte e lehtë. Për të përballuar qiranë e shtëpisë, e përdorte herë pas herë shtëpinë si një klub nate.
Në vitin 1997, themeloi bashkë me vëllain e vogël kompaninë Zip2, të cilën e shiti pas 4 vitesh për më shumë se 330 milionë dollarë. Ai pati një sukses të ngjashëm me Paypal dhe Tesla Motors.
Projekti i tij më ambicioz është SpaceX, me të cilin hyri në histori, duke prodhuar raketat Falcon dhe Dragon, për të transportuar masivisht në orbitë mallra dhe njerëz. Musk nuk e ka fshehur kurrë, se misioni kryesor i SpaceX, është të dërgojë për herë të parë qenie njerëzore në planetin Mars, duke synuar të ndërtojë një koloni, në gjendje të jetojë në mënyrë të pavarur./ Tirana Today
