I ati i Danjel Pepajt, shtetasi Rrok Pepaj është ndaluar nga blutë e Shkodrës, dhe aktualisht ndodhet në komisariat. Rrok Pepaj është ndaluar në cilësinë e dëshmitarit të ngjarjes.
Gjatë ditës së sotme, Rrok Pepaj ka shoqëruar forcat policore në vendin ku u gjetën trupat e pajetë të dy kushërinjve, Klement Papaj dhe Vilson Çutaj. Ata dyshohet se janë vrarë nga Danjel Pepaj, kushëriri i tyre, i cili është shpallur në kërkim.
Viktimat u gjetën pranë një parcele me kanabis sativa në fshatin Vrith të Malësisë së Madhe. Policia dyshon se Danjel Pepaj mund ta ketë djegur parcelën, pasi ka vrarë me armë Klement Pepajn dhe Vilson Çutajn.
Mes tre kushërinjve ka patur një konflikt për vjedhjen e 50 kg kanabis. Kanë qenë dy viktimat që akuzonin kushëririn e tyre Danjelin, se ju kishte vjedhur mallin.
Tre të rinjte u zhdukën më 3 Tetor, duke lënë të shqetësuar familjarët e tyre, e duke lënë në dyshime për arsyet e humbjes.
Pas shumë ditësh kërkimesh, sot u gjetën dy trupat e pajetë të Vilsonit dhe Klementit, pak metra nga njëri-tjetri, mes shkurreve, të ekzekutuar me kallashnikov.
Ndërkohë, ai që dyshohet se ka kryer të gjithë ngjarjen, Danjel Pepaj është i arratisur, e dyshohet se është në Mal të Zi.
