Vrasja e gjeneralit iranian në Irak është shoqëruar me reagime të shumta dhe tensione ndërmjet SHBA-së dhe Iranit. Në lidhje me eliminimin e tij ka reaguar edhe kryeministri irakian, Adil Abdulmahdi.
Ai theksoi se eliminimi i komandantit Qassem Soleimani do të ketë pasoja të rënda në rajon. Sipas tij, është shkelur integriteti i vendit të tij. Për të, me këtë veprim SHBA-ja ka ndezur fitilin e një tjetër lufte shkatërrimtare jo vetëm në vend por në tërë rajonin.
“Ai ka qenë simbol i fitores mbi ISIS”, mësohet të ketë thënë Abdulmahdi raporton Anadolu Agency.
“Atentati ndaj një udhëheqësi zyrtar ushtarak irakian përbën armiqësi ndaj popullit, shtetit dhe qeverisë irakiane. Likuidimi i udhëheqësve ushtarakë nga vendet irakiane dhe vëllazërore (Irani) në territorin e Irakut është një shkelje e sovranitetit të vendit tonë, një sulm për nderin e këtij vendi. Për më tepër, ky sulm ndezi fitilin e një lufte shkatërruese në Irak dhe rajon. Sulmi gjithashtu bie ndesh me kushtet e qëndrimit të trupave amerikane në Irak”, ka deklaruar Abdulmahdi.
Në sulmin e mbrëmshëm në aeroportin në Bagdadit është vrarë komandanti Soleimani, i cili kryesonte njësinë elitare iraniane të Gardës Revolucionare, ndërsa SHBA-të njoftuan se sulmin e kanë kryer forcat amerikane me direktivë të presidentit të vendit, Donald Trump.
