Gjykata e Lezhës ka dhënë masën “Arrest me burg” për 52-vjeçarin, Tonin Ndoj, i cili vrau mikun e familjes dy ditë më parë në fshatin Merqi, kryeplakun e fshatit, Gjin Marku.
Në ambientet e Gjykatës nuk është parë asnjë nga familjarët e Ndojit, por kur Ndoji doli me pranga në duar nga Gjykata për tek fugoni, vajza e tij, e cila po qëndronte jashtë dhe po e shikonte këtë moment, shpërtheu në lot.
Kujtojmë se viktima u qëllua me breshëri kallashnikovi nga dhëndri i familjes së tij Tonin Ndoj. Autori dhe viktima të cilët ishin miq familjeje me njëri tjetrin fillimisht u konfliktuan me njëri-tjetrin dhe më pas 52-vjeçari ka qëlluar me breshëri ndaj kryeplakut të fshatit duke i shkaktuar vdekjen e menjëhershme.
Nga hetimet e policisë thuhet se ngjarja ka ndodhur pas një konflikti ku autori i kishte kërkuar mikut të tij që t’i jepte barin që kishte korrur, por kjo nuk është pranuar nga viktima. Në momentin kur ka parë 64-vjeçarin që po mblidhte barin dhe po e ngarkonte në kamionçinën e tij, autori ka marrë armën dhe ka qëlluar në drejtim të mikut të tij duke e lënë të vdekur në vend.
