Policia e Shtetit publikoi pak më parë fotot dhe emrat e 5 prej personave më të kërkuar në vend.
Në këtë listë shihet se bën pjesë edhe drejtuesi i bandës së Mirditës, Llesh Syziu (Ndoj). 49-vjeçari është dënuar në mungesë me burgim të përjetshëm, për vrasjen e një efektivi policie.
Ngjarja në fjalë ka ndodhur më 28 qershor të vitit 2000, kur 6 pjesëtarët e bandës së Mirditës vendosën që të grabisnin disa pjesë këmbimi për makina, në një parking pranë ish-SMT-së së qytetit.
Roja i parkingut njoftoi në atë kohë policinë për grabitjen, e cila u paraqit më pas në vendngjarje. Pasi kanë parkuar makinën jashtë ish-SMT-së, policia i ka kërkuar anëtarëve të bandës që të dorëzohen.
Por ata kanë filluar të qëllojnë në drejtim të policëve, duke lënë te vrarë efektivin Gjon Pacuku dhe të plagosur Nikollë Markun, Bardhosh Jakun e Ndue Çupin. Pesë anëtarët e tjerë të bandës ishin: Dritan Syziu, Nikollë Syziu, Bardhok Syziu, Tonin Gjoka dhe Arjan Reçi.
