Dy persona pritet të shpallen në kërkim ndërkombëtar, pasi janë të dyshuar si të përfshirë në ekzekutimin e 26-vjeçarit, Xhulio Prela, në datën 5 dhjetor në superstradën Lezhë-Laç.
Lidhur me këtë ngjarje të rëndë, grupi hetimor ka arritur të zbardh detaje të rëndësishme që kanë çuar deri në emrat e personave.
Për shkak të sekretit hetimor, identiteti i tyre nuk bëhet me dije, teksa dyshimet janë se ka pasur konflikt të çastit midis viktimës Xhulio Prela dhe autorëve të ngjarjes.
26-vjeçari po kthehej nga Shkodra në orët e para të mëngjesit të 5 dhjetorit, nga ku kishte dërguar më herët një mikun e tij që ishte kthyer nga Anglia.
Xhulio Prela ishte i ri në radhët e Policisë së Shtetit, dhe nuk ka patur probleme me ligjin apo me persona të tjerë jashtë punës.
Vrasja ndodhi në afërsi të fshatit Gajush, në orën 03:00 të mëngjesit, teksa dyshohet se Xhulio Prela është qëlluar nga afër me tre plumba, ndërsa njëri prej tyre ka qenë në zemër duke i shkaktuar vdekjen. Pasi u qëllua, makina tip “Volkswagen” ka ecur në gjendje të lirë për disa qindra metra, duke përfunduar në anë të rrugës.
