Pas vrasjes së gjeneral Qasem Soleimanit, njeriu i dytë më i fuqishëm i këtij vendi, eksperti i çështjeve ndërkombëtare dhe sigurisë Adrian Shtuni mbetet i bindur se asgjë nuk do lihet me kaq, por do të ketë hakmarrje. Në një lidhje ‘live’ me emisionin “Real Story” në News24 nga Uashingtoni, eksperti i çështjeve ndërkombëtare, duke bërë një bilanc të ngjarjeve që kanë pasuar pas ditës së ekzekutimit të Soleimanit, thotë se priten zhvillime. Kjo pasi gjeneral Qasem Soleimani është njeriu i dytë më me pushtet në Iran. Po kështu, Irani funksionon nëpërmjet milicive dhe ka celula që operojnë gjithandej.
“Unë mendoj që aleancat kanë kosto. Nuk mundet shqiptarët të mendojnë vetëm se kanë për të marrë benefitet, ka edhe kosto. Bota nuk është lineare. Duhet të jemi më pragmatikë dhe të shikojmë se bota nuk funksion në mënyrë të tillë, se ka edhe gabime. Sa i përket artikullit të 5 të NATO-s, nëse një anëtar i NATO-s sulmohet është sulmuar e gjithë Aleanca. Irani nuk ka kapacitet që të ndërmarrë ndonjë goditje konvencionale. Goditje konvencionale ndaj Amerikës edhe ajo që ishte ishte telegrafike. Ishte reklamë. Çfarë mund të ndodhë sa i përket rrezikut? Se hakmarrje ka për të pasur, është e pamundur.
Hassan Nasrallah dihet se kush është dhe organizata e tij Hezbollah terroriste që ka për të vazhduar. Soleimani nuk ishte vetëm lideri i KUDS, por njeriu i dytë më me pushtet në Iran. Do isha i habitur nëse nuk do kishte goditje hakmarrëse, por do jetë asimetrike. Irani funksionon nëpërmjet Proxy dhe milicive dhe ka celula që operojnë gjithandej. Dhe ka për të qenë e vështirë të aplikohet artikulli 5, vetëm nëse ka të dhëna të sakta që sulmi është bërë nga Irani”, deklaroi eksperti.
Përplasja mes SHBA dhe Iranit ka disa vite që ka dalë në sipërfaqe, pas prishjes së marrëveshjes nga Trump dhe vendosjes së sanksioneve. Në fund të dhjetorit tensionet u shtuan, kur u vra një punonjës amerikan. Vrasësi nuk u gjet dhe u vra një civil. Vrasja e gjeneralit iranian në një sulm me avionë amerikanë ka bërë bujë në të gjithë botën, duke shkaktuar alarmet e sigurisë së ambasadave në të gjithë Lindjen e Mesme dhe duke rritur kështu sigurinë në SHBA.
