Ekzekutimi me armë zjarri i efektivit të policisë, Xhulio Prela, mëngjesin e së shtunës në superstraden Lezhë-Milot, vijon të mbetet pa autor.
Pista kryesore që po hetohet, është ajo e ndonjë konflikti përsonal që mund të ketë pasur 26-vjeçari me ndonjë person gjatë ditëve të fundit, por që nuk ju ka rrëfyer familjareve apo shokëve të tij.
Gjithashtu, po verifikohet edhe veprimtaria e vëllait të viktimës, i cili prej disa kohësh është emigrant në Britaninë e Madhe.
Ndërkohë, referuar dinamikes së ngjarjes, dyshimet janë se efektivi i policisë ka komunikuar në telefon para se të vritej, pasi ndonëse kishte përshkuar disa metra rrugë në drejtim të Tiranës, është kthyer sërish në vendin ku po e prisnin autoret pranë fshatit Gajush të Lezhës.
Kamera e sigurisë e një biznesi pranë vendit të ngjarjes ka fokusuar momentin kur Xhulio Prela është afruar dhe ka biseduar me njërin nga personat që ndodheshin aty, e më pas është qëlluar me armë zjarri.
Por, në pamje është mjaft i vështirë identifikimi i automjetit të autorëve, duke qenë se aty pranë ka qenë i parkuar dhe një mjet i tonazhit të rëndë, i cili ka penguar pamjen e plotë.
Pamjet filmike të kameres së sigurisë janë dërguar për analizim të specializuar bashkë me telefonin e viktimës. Këto janë dy provat më të vlefshme për grupin hetimor që mund të çojnë në identifikimin e autoreve të kësaj ngjarje.
Efektivi i Forcave të Ndërhyrjes së Shpejtë të Shkodrës, Xhulio Prela, u ekzekutua me armë zjarri pistolete në oret e para të mëngjesit të së shtunës, teksa po kthehej nga Hajmeli i Shkodrës ku kishte dërguar një mik të vëllait të tij, i cili kishte ardhur nga Anglia përmes aeroportit të Rinasit pak minuta pas mesnate.
