Një ditë më parë, Komiteti Teknik doli me masat e para, për kufizimin e lëvizjes nga ora 10 e mbrëmjes deri në 6 të mëngjesit, dhe mbylljen e bareve dhe restoranteve po në këtë fashë orare. “Kemi analizuar me hollësi dhe në detaje rezultatin e masave të marra deri më tani, si dhe eksperiencën e vendeve përreth. Kemi evidentuar se në Shqipëri është vënë re një shtim i transmetueshmërisë së infeksionit. Në kushtet ku nuk ka ende një kurë, mënyra më e mirë është parandalimi. Kufizimi i lëvizjes nga ora 22:00- 06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme”, deklaroi dje zëvendësministrja e Shëndetësisë, Mira Rakacolli.
Eksperti i shëndetit publik, Erion Dasho, deklaroi në “Wake Up” se vendimi i marrë për mbylljen pas orës 22:00 është i pakuptimtë. Ai tha se situata në vend mbetet shqetësuese, ndërsa kemi pacientë që presin në ambulanca për t’u shtruar në spital.
“Në Ballkan jemi në të njëjtën situatë për sa i përket pandemisë, por ata testojnë më shumë se ne. Situata në Shqipëri është shqetësuese, kemi pacientë që presin në ambulanca për t’u shtruar në spital.
Mbyllja nga 22:00 deri në 06:00 është një masë e pakuptimtë, nuk ka asnjë rol në parandalimin e Covid. Duke qene nëse se Ministria e Shëndetësisë dhe Komiteti Teknik nuk forcuan kapacitet testuese, të paktën testet e shpejta duhet t’i kishin në dorë mjekët e familjes.
Situatë katastrofike, qytetarët po mjekohen në shtëpi me shpenzime të mëdha, dhe jo siç duhet. Duhen marrë masa si në Europë, duke mbyllur palestra, biznese, por duke i kompensuar bizneset për humbjet e tyre. Ka plot mënyra se si mund të kompensohen, pa nxjerrë lekë cash nga xhepi”, sqaroi Dasho.
