Ditë e zezë për futbollin spanjoll!
Ekipi me mjaft histori, Deportivo La Coruna, po përjeton ditët e saj më të errëta, ndërsa tashmë nuk është më pjesë as e Segunda Division, por ka zbritur në kategorinë e tretë.
La Coruna ra nga kategoria pa e luajtur ndeshjen e saj të fundit, pasi takimi ndaj Fuenlabradas nuk u luajt për shkak të infektimit të gjashtë futbollistëve miq me koronavirus.
Gjithsesi, fitorja e rivalëve për mbijetesën, Albacete dhe Lugo në javën e fundit të kampionatit, vulosi tragjedinë e klubit nga Galicia.
Rënia e Deportivo La Couruna vjen 20 vjet pasi arriti të fitojë titullin kampion në La Liga, periudhë e cila shënonte në atë kohë vitet më të arta të klubit.
Në vitin 2002, pas dy sezonesh, La Coruna ia doli të fitojë Kupën e Mbretit, ndërsa në vitin 2004 u regjistrua arritja e tyre më e madhe në Evropë, gjysmëfinalistë të Champions League.
Spanjollët e kanë mbyllur kampionatin në La Liga mes tre skuadrave të para prej vitit 1993 deri në vitin 2004, shkruan “A2”.
Hera e fundit kur Deportivo La Coruna ishte pjesë e divizionit të tretë të futbollit në Spanjë ka qenë sezoni 1980-1981.
