Inspektoriati i Lartë i Drejtësisë, ka dërguar një ekip në Gjykatën e Elbasanit. Ekipi i posaçëm i ILD-së është ngritur për rastin e gjyqtares Enkeleda Kapedani. Mësohet se grupi i ILD-së do të fotografojë zyrën e Kapedanit dhe ambientet e Gjykatës, për të vërtetuar videot të cilat u bënë virale.
Në videot e bëra publike, Kapedani ecën brenda korridoreve të Gjykatës dhe pozon provokuese në zyrë. Në një video tjetër ajo filmon veten duke dëgjuar në sfond një këngë ku dëgjohen fjalë si “Mafia” apo “Kolumbia”.
Enkeleda Kapedani përdorte zyrën e punës për video argëtuese, në rrjetet sociale. Videot morën bujë pas publikimit në TikTok.
Publikimi i tyre ka vënë në lëvizje institucionet e drejtësisë në vend. Fillimisht Inspektorati i Lartë i Drejtësisë urdhëroi fillimin e një hetimi disiplinor ndaj Enkeleda Kapedanit. E më pas një reagim i ashpër erdhi nga Ministrja e Drejtësisë, Etilda Gjonaj, që kërkonte edhe hetim të pasurisë së saj.
