Nga Bardhi Quku/Kryeministri Edi Rama është përpjekur sërish që të justifikohet për procesin e reformës në drejtësi dhe mënyrën sesi kanë rrjedhur ngjarjet deri më sot, përfshi edhe 21 janarin e pazbardhur.
Nga foltorja e Kryeministrisë Rama u sfilit për të gjetur një alibi mbi katër viktimat e 2011-s, kur përballë kishte familjarët e Ziver Veizit, Faik Myrtarjt, Aleks Nikës dhe Hekuran Dedës.
Në fjalimin e tij prej 40 minutash Rama kishte listuar edhe armiqtë që nuk po e lënë të bëjë Reformën në Drejtësi dhe për rrjedhojë të zbardhë edhe 21 Janarin, për të cilin është përbetuar vazhdimisht, por askush nuk është dërguar përpara drejtësisë.
U mundua aq shumë, si zakonisht, që ta paraqesë veten si i “kulluari” në misionin e tij për të bërë të mundur realizimin e plotë të kësaj reforme kur vuri përballë vetes një listë të plotë armiqsh.
Ashtu si vetë Don Kishoti, vetëm se në këtë rast edhe vetë Rama është pjesë e asaj liste që lexoi në sytë e ngulitur fort tek ai të familjarëve të viktimave fatkeqe të 21 janarit.
“Në këtë luftë ka njerëz të pushtetshëm të pasur dhe shumë të pasur të vendosur të bëjnë çmos, më shumë se të pamundurën për të ruajtur kokën e tyre, duke e penguar zbatimin e këtij projekti kombëtar ardhmërie. Janë politikanë, gjykatës, prokurorë, zyrtarë, biznesmenë, botues të falimentuar, komentatorë të mirëpaguar, fuqi të huaja apo spiunë të tyre e të tjerë akoma. Dhe nuk janë akoma të mundur”, nxitoi të justifikohej si për të kryer ritualin e çdo viti kur data i qëllon 21 Janar.
Një datë që sa herë e sheh në kalendar dhe sa herë hedh sytë nga dritarja e Kryeministrisë e bën të gëlltitet.
Megjithatë, duket se është mësuar me këtë proces fiziologjik, kur e kap aq shpesh turravrapi për të gjetur alibinë e radhës dhe bën gati listën me armiqtë që ia kanë prerë duart që të bëjë drejtësi.
Një narrativë politike shumë e njohur kjo për veshin e njerëzve, të cilëve propaganda komuniste u shpëlante trurin me teza të tilla duke gjetur armikun e jashtëm sa herë mund të vihej në pikëpyetje regjimi enverist.
Ndaj Rama guxoi sot të përdorë këtë narrativë të neveritshme përpara familjarëve të 21 janarit.
Ishte një përpjekje e shëmtuar për t’u mbuluar me “gjethe fiku”, gjethet e të cilave i kanë rënë prej kohësh. Ndërsa tani shëtit si mbreti lakuriq i Andersenit.
Në këtë shëtitje nuk është i vetëm, por ecën bashkë me shkaktarët e kësaj ngjarjeje, dhe me ata që shkrepën këmbëzën drejt katër qytetarëve të thjeshtë, të cilët Rama i kishte thirrur me një motiv përtej politikës. Por, që për fat keq përfunduan në mish për top dhe u bënë kali i betejës së Ramës për të ardhur në pushtet.
Ai ngjiti godinën e Kryeministrisë në mënyrën më të turpshme, kur hyri në shtrat me Ilir Metën.
Ndërsa ky i fundit pas braktisjes së LSI-së dhe ngujimit të tij prej murgu në Presidencë lëshon shantazhe se as “fuqitë jashtëtokësore” nuk mund ta prekin, jo më Rama.
Por kryeministri “misionar” është aq i babëzitur për pushtet, sa është i gatshëm që të bëjë paktin e radhës, siç e ka treguar gjithmonë dhe të hedhë valle mbi katër viktimat e 21 janarit.
Edhe pse nuk rresht së thëni çdo vit se do të bëjë drejtësi mbi këtë ngjarjeje, por ja që nuk e lënë agjenturat e huaja.
Ndaj sot Rama gjeti alibinë dhe ia hodhi të përcjellë familjarët e viktimave kur përballë godinës prej së cilës dolën 4 fishekët e Berishës përshkoi nën shi me makinën e tij ish-ministri i Brendshëm i asaj kohe, Lulzim Basha, si duket për t’i hedhur një sy vendit nëse skena e të shtunës së ardhshme do t’i ngjajë asaj të 21 janarit të 2011-s.
Ndërkohë Rama vijon ecejaket e tij ashtu si mbreti lakuriq i Andersenit duke u tundur me listën e armiqve në dorë.
TIRANA TODAY
