Prokuroria e Krimeve të Rënda nuk ka lejuar familjen të tërheqë nga morgu i Tiranës trupin e pajetë të Admir Muratajt. Raportohet se ky ngërç vjen pas dyshimeve që Prokuroria ka për vrasjen e Muratajt, nëse është ekzekutuar nga policia apo nga bashkëpunëtorët e tij në grabitjen e parave në Rinas. Kërkesa për ekspertizë mjeko-ligjore është bërë nga prokurori Arenc Çela.
Burimet zyrtare ende nuk kanë dhënë një informacion të saktë se nga kush është qëlluar Murataj, por raportohet se ai ka qenë më agresivi ndaj policisë.
Tashmë hyrja dhe dalja e furgonit të bardhë të grabitësve me mbishkrimin “Hetimi Tatimor” është fiksuar nga kamerat e sigurisë. E gjithë grabitja ka nisur në orën 14:40 minuta, në momentin kur ndërroheshin turnet e stafit të aeroportit.
Viktima Admir Murataj është njohur nga bashkëshortja dhe familjarët e tij, të cilët mëngjesin e kësaj të mërkure ishin pranë morgut të Tiranës.
Murataj me banim në Prezë është nga Tropoja, dhe prej disa vitesh ishte në kërkim për disa nga grabitjet më të bujshme të parave në Shqipëri. I ndjeri, gjatë jetës së tij ka përdorur edhe identitete të rreme, kërkohej edhe nga drejtësia greke, si i arratisur nga burgu i Trikallës 6 vjet më parë, ku ishte dënuar për vjedhje bankash me armë.
Pas arratisjes, u kthye në Shqipëri ku nisi një seri grabitjesh që kishin si objektiv bankat dhe transportimin e parave të tyre. Ekspertiza ligjore tani është duke verifikuar se kush e vrau grabitësin.
